التُّخان
أنا عارف إن كرسي القطر ضيّق, ودا سيِّء كفاية, بس انتِ مش فاهمة, وانا ماكنتش فاهم برضه, بس أنا كنت محظوظ وماكانشي حواليّ ناس كتير غيري يوم ماعرفت, فعرفت أستكشف واكتشفت.
بس أصل الزرار اللي بيْرَجَّع الكرسي لورا جنب رِجْلِك اليمين, عند الفخد بس من بَرّا, فتطلعي بجسمِك كُلّه لقُدّام وتْبُصّي وَرَاكي, تزُقّي الكرسي تلاقيه ثابت, تتطمّني فترجعي بجسمِك تاني لِوَرا, تلاقيه بيرجع تاني. الهمهمات اللي في ودني وابنِك اللي قاعد جنبِك وعنده حرارة كانوا كافيين عشان يخلّوني أشيل السمّاعة واشرحلِك الوضع, بس انتِ صَدَّقتي على كلامي بابتسامة مُحْرَجَة من غير ماتفكّري, وبصّيتيلي بَصّة اللي هوّ “أرجوك دلوقتي حالًا خلّصني من الإحراج دا وبُصّ تاني الناحية التانية.”
من غير تَبَاكي ولا شفقة, معلش ماتزعليش واللهِ, في الأغلب القَطْر صمّمه واحد رُفيّع, بطُرْقِتُه الضيّقة اللي بتخلّي التُّخان يمشوا بمُناورة معيّنة وكُلّ كام خطوة يسندوا على كرسيكي اللي هوّ بيتلكّك أصلًا عشان يرجع لِورا.
كُنت ناوي أكْشِف التفصيلة دي في فيلم عن التٌّخان اسمه “التُّخان,” بس احنا أوْلَى. وعلى كل حال السينما شيء مش مهم وكراسيها واسعة كفاية فالرفيّعين مش هيفهموا أوي وهُمّ بيتفرّجوا.
Notes
-
iamair liked this
-
jailan-elshafie liked this
-
idttirab liked this
-
storiesofthestreet liked this
-
nohareda said:
جميلة :)
-
nohareda liked this
-
18991th liked this
-
casablancasyndrome liked this
-
jesuismoi87 liked this
-
punchlinecinephile posted this
